Herøy

Herøy ligg på ytre søre Sunnmøre, og er ei av Noregs største fiskeri og offshorekommunar. Kommunen med 8400 innbyggarar består av omtrent 200 små og store holmar og øyer, der dei største er busette og bundne saman av bruer.

Kommunesenteret Fosnavåg har vore igjennom ei rivande utvikling siste åra, og har mykje å by på. Siste tilveksten er den lune båthamna, ein triveleg møteplass for båtfolket. Herøy har sterke historiske røter, og det er i dag mogleg å sjå eksempel på dette gjennom kyrkjeruinar, gravrøyser og eit storslått vikingspel. Båten og fiskeriet er sjølve livsnerven har ute, og det er naturleg at kommunen byr på historier og gjenstandar innan dette emnet.

Herøy Kystmuseum held til i dei vakre gamle bygningane på Herøy Gard. Her får du eit innblikk i båten si utvikling gjennom kopien av Kvalsundbåten og sunnmørsjekta "Anna Olava". Du får også vere med på ei tidsreise gjennom denne staden si unike tusenårige soge. Herøy er omkransa av fantastiske havområde som er eit eldorado for fiskarar og dykkarar. Den eineståande øya Runde er hekkestad for meir enn 500 000 fugl i året, og vert kalla Skatteøya etter gullfunna frå det hollandske skipet Akerendam som forliste i 1725. Å bli med på en båttur for å sjå det yrande fuglelivet og den barske naturen er eit friskt pust i ein hektisk kvardag!